ತಾಯಿ ಬೇರು

ಮರುದಿನ ಬೆಳಿಗ್ಗೆ, ಆಗಲೇ ಬಿಸಿಲು ರೂಮಿನ ಕಿಟಕಿಯಿಂದ ಒಳನುಸುಳುತ್ತಿದ್ದರೂ, ವಿಕಿ ಇನ್ನೂ ನಿದ್ದೆಯಲ್ಲಿದ್ದ. ಅಮ್ಮ, ಅಪ್ಪ ಮತ್ತು ಅಕ್ಕ ಮೈಸೂರಿನಲ್ಲಿನ ನೆಂಟರ ಮನೆಗೆ ಹೋಗಿದ್ದರು, ಒಂದು ವಾರ ಅವರ ವಾಸ ಅಲ್ಲಿಯೇ. ಮನೆಯಲ್ಲಿ ವಿಕಿ ಒಬ್ಬನೇ. ಹಾಗಾಗಿ, ಎಂದಿನಂತೆ, ಅವನನ್ನು ಎಬ್ಬಿಸುವ ಜವಾಬ್ದಾರಿ ವೈರಸ್‌ನದ್ದಾಗಿತ್ತು. ಮನೆಯಲ್ಲಿದ್ದ ಪೇಪರ್‌ಗಳು ಗಾಳಿಯಲ್ಲಿ ಹಾರಾಡುತ್ತಿದ್ದರೆ, ಅಡುಗೆ ಮನೆಯಿಂದ ಸಣ್ಣಪುಟ್ಟ ಪಾತ್ರೆಗಳು ಒಂದಕ್ಕೊಂದು ತಾಗುವ ಶಬ್ದ ಬರುತ್ತಿತ್ತು. "ಅಯ್ಯೋ ವೈರಸ್, ಇನ್ನು ಬೆಳಗಾಗಿಲ್ಲ, ನಿನ್ನ ಪ್ರತಾಪ ಶುರುಮಾಡಿದ್ಯಾ?" ವಿಕಿ ನಿದ್ದೆಗಣ್ಣಲ್ಲೇ ಕೂಗಿದ. "ಅಲ್ಲ ಕಣೋ, ಎಷ್ಟು ಹೊತ್ತು ಮಲಗುವೆ? ಸೂರ್ಯ ಏರಿ ಬಂದಿದ್ದಾನೆ, ಹೂವಿನ ಗಿಡಗಳಿಗೆ ನೀರು ಹಾಕುವ ಸಮಯ ಕಳೆಯುತ್ತಿದೆ.! ನಿನ್ನಮ್ಮ ಬೆಳಿಗ್ಗೆನೇ ಎದ್ದು, ಮನೆ ಅಂಗಳಕ್ಕೆ ನೀರು ಹಾಕಿ ಇಷ್ಟು ಹೊತ್ತಿಗೆ ತಿನ್ನೋಕೆ ಏನಾದರೂ ಮಾಡುತ್ತಿದ್ದರು. ನಿನ್ನಂತೆ ಅವರು ಮಲಗುವುದಿಲ್ಲ.!" ವೈರಸ್‌ನ ಧ್ವನಿ ಅವನ ಕಿವಿ ಹತ್ತಿರ ಸುಳಿದಾಡಿತು. ವಿಕಿ ನಿದ್ರಾವಸ್ಥೆಯಿಂದ ನಿಧಾನವಾಗಿ ಹೊರಬಂದ. "ಅಯ್ಯೋ ವೈರಸ್, ನನಗೊಂದು ಒಳ್ಳೆ ನಿದ್ರೆ ಬಂದಿತ್ತು. ಅದನ್ನ ನೀನು ಹಾಳು ಮಾಡಿದೆ. ನಾನು ಮಲಗಿದ್ರೆ ನಿನಗೇನು ಕಷ್ಟ?" "ನಿನಗೆ ಗೊತ್ತು ಕಣೋ ವಿಕಿ. ನೀನು ಇಲ್ಲದೆ ನನಗೆ ಬೋರ್ ಹೊಡೆಯುತ್ತೆ. ನಿನ್ನ ಜೊತೆ ಮಾತನಾಡುವುದು, ತರ್ಲೆ ಮಾಡುವುದೇ ...